Inspirational Punjabi Poem For Youngers - Punjabi Poem

Inspirational Punjabi Poem For Youngers

This is an inspirational Punjabi poem for young generation. In this motivational poem, the poet advises the youngsters to take care of their parents especially when they are in old age. I often tell the boys; you pay attention to the parents. Those who raised young, ever pay attention to them. Let’s read this inspirational Punjabi poem.

💢💢💥💢💢

پنجابی نظم:   نویں نسل نوں پیغام

میں اکثر کہناں مُنڈیاں نوں، تُسی ماء پیو وَل دھیان کرو۔

جنہاں پال پوس جوان کیتا، کدی انہاں ول دھیان کرو۔

خود روکھی سوکھی کھا کے تُہانوں تَر نوالہ دِتا اے۔

اَج شاہی ہتھ تہاڈے ہے، تسی انہاں ول دھیان کرو۔

تُسی اپنڑے ہانڑ دے مُنڈیاں نال شیزان تے پیپسی پیندے ہو۔

جیڑھےپیندے نیں پانی چھپڑاں دا، کدی انہاں ول دھیان کرو۔

تُسی جشن منائے ہوٹل دے، بکرے مرغے دے پیس کھادے۔

جنے دال مسُور دی کھادی اے، کدی انہاں ول دھیان کرو۔

توں کالج جاویں سائیکل تے، کدی جاویں موٹر سائیکل تے۔

جیڑا پیدل بنے کچھدا اے، کدی انہاں ول دھیان کرو۔

توں لےلحاف تے کمبل نے، نال اے گدّے تکیے دو دو نے۔

جیڑھے جھُلی دے وچہ سُتّے نیں، کدی انہاں ول دھیان کرو۔

پا جوڑا جُتّی نویں نے، چا عید نوں عید منایا اے۔

جِنؔے پھَٹّی دھوتی پائی اے، کدی انہاں ول دھیان کرو۔

توں فِلماں ویکھیں سینما تے، نال اے آرٹ کونسل ڈرامیاں تے۔

جیڑھےسُنڑدےنیں وعظ مسیتاں وچہ،کدی انہاں ول دھیان کرو۔

حق بنڑدا اے دال مسُور دی کھا، کدی ماء پیو نوں وی کُکڑ کھَوا۔

جیڑھے ساری زندگی سِکدے رہے، کدی انہاں ول دھیان کرو۔

کدی ماء پیو نوں وی خوش ہو کے، کوکاکولا، پیپسی، شیزان پلا۔

او منگدے نئیں پر حسرت ہے، تُسی انہاں ول دھیان کرو۔

کل مر گئےتے دیگاں چاڑھیں گا، نالے ختم شریف دیوا ویں گا۔

وچہ سیب انار لے آویں گا، نالے مرغی چاول پکاویں گا۔

کُجھ مُلّاں گھر لےجاویں گا، کُجھ لوکاں نوں کھِلاویں گا۔

اے ویلا ہتھ نی آوےگا، پھر رونویں گا، پچھتاویں گا۔

ربّ موقع دِتا اے تینوں، تُوں کھول دماغ دی کھڑکی نوں۔

اے عین عبادت ہے تیری، تُسی ماء پیو ول دھیان کرو۔

ہُنڑ اِس توں اَگے کی آ کھاں، جوکہنڑاں سی میں کہہ دِتا۔

جےجنّت جانڑاں اے  خاورؔ  پھر ماء پیو ول دھیان کرو۔